1994-ലെ കേരള പഞ്ചായത്ത് രാജ് ആക്ട് 4-ാം വകുപ്പ് (1)-ാം ഉപവകുപ്പ് പ്രകാരം സർക്കാരിന് ഓരോ ഗ്രാമത്തിനോ ഗ്രാമങ്ങളുടെ കൂട്ടത്തിനോ ഒരു ഗ്രാമപഞ്ചായത്ത് രൂപീകരിക്കാവുന്നതാണ്. ജനക്ഷേമ കാര്യങ്ങളിലും നിയമപരമായ ചുമതലകളിലും മാത്രമല്ല, ആസൂത്രണം, വികസനം, ശുചിത്വം, ആരോഗ്യം, വിദ്യാഭ്യാസം തുടങ്ങിയ ജനജീവിതത്തിന്റെ സമസ്ത മേഖലകളിലും ഗ്രാമപഞ്ചായത്ത് അതിന്റെ ചുമതലകൾ നിർവഹിക്കുന്നു. 73-ാം ഭരണഘടനാ ഭേദഗതിയും കേരള പഞ്ചായത്ത് രാജ് ആക്ടും അനുബന്ധ ചട്ടങ്ങളും ഗ്രാമപഞ്ചായത്തുകൾക്ക് വിപുലമായ അധികാരങ്ങളും വിഭവങ്ങളും കൈമാറിയിട്ടുണ്ട്. ഇ-ഗവേണൻസ്, ഫ്രണ്ട് ഓഫീസ് സംവിധാനം തുടങ്ങിയ നൂതന സംവിധാനങ്ങൾ മുഖേന ജനസൗഹൃദ സേവനങ്ങൾ ഗ്രാമപഞ്ചായത്ത് ഉറപ്പാക്കുന്നു. | 
